Violeta Rosario-Cicilia
Fuera di skirbi kuenta tin mas talento ku Señor a regalá mi. Mi a traha komo edukador pa kuarenta aña na nos skolnan. Riba tereno musikal tambe mi a kuminsá hopi tempran, for di edat di nuebe aña, ku siña toka òrgel.
Mesora mi mester a bira miembro di kor i kuminsá sera konosí ku kantikanan i ritualnan di Santu Eukarestia. Awendia mi ta miembro di kor pa setentidos aña ku amor pa yuda animá nos sirbishinan. Mi a kanta tambe den kor Ars Cantandi pa hopi aña. Mi no a keda na òrgel so, mi a sigui estudio di diferente instrumènt: e.o. piano, blòkflùit, kuarta, kitara, dwarsflùit, klarinèt, saksofon i sinfonia ku e meta pa pasa mi talentonan pa otronan interesá pa siña. Mi tin kuarentitres aña dunando lès privá. Hopi di nos musikantenan ku a bira músikonan internashonal, a hasi nan preparashon básiko na mi Sentro Musikal Boyèt.
Pa formashon di bos tambe hopi persona a pasa praktiká serka mi. Mi a forma i dirigí diferente kor di mucha i hóbennan, kantando pa iglesia i tambe pa okashonnan partikular. Entre otro durante di bishita di nos miembronan di kas Real, Reina Beatrix i Rei Willem Alexander i Reina Maxima. E parti di aktuashon tambe a bini dilanti den mi kursonan na momentu ku ta sera un kurso mester a presentá un obra improvisá. Pa esaki mi tabata skirbi komedia pa nos hóbennan ku por presentá na diferente okashon. Nos a graba algun di e presentashonnan. Meskos tambe e studiantenan di Sentro Musikal Boyet a hasi diferente grabashon di C.D. instrumental ku piano i tambe ku kitara, kuarta, bas i kanto di e kor.
Gradisimentu na Señor pa tur e talentonan ku a risibí i ku mi por a pasa nan pa tur ku a disfrutá di nan, Nunka bo no por bai ku bo bendishonnan sin kompartí nan ku otro.
Publicaties
