E mata di huku, ta un mata ku ta krese na un manera solitario. Hopi hende no konosé e mata di huku mes. E ta krese den baranka òf den tera kleps i seku. E ta un mata ku no tin mester di awa tur dia. E momento ku huku ta hala atenshon ta den e temporada ku e ta floria. Na e momentu ku huku ta floria, durante dia kasi bo no ta ripara mes ku e ta floriando. Mas parti den ora di anochi e perfume di flor di huku ta yena airu. E ta algu masha spesial i romántiko.
Flor di Huku ta e tomo di poesia ku Regina “Uchi” Frans ta debutá kuné despues di a move hopi tempu kaba den e mundu literario boneriano. Regina Frans ta konosí di diferente presentashon komo poeta i outor na Boneiru i Kòrsou (presentashon na Siman di Buki, a risibí na 2004 Tapushi di Oro di “Fundashon Arte di Palabra”.
Reseña kòrtiku:
Pa amantenan di "Luna Yen ku Poesia i Storia" un soño ta bira realidat. Pa Uchi mes tambe un deseo ferviente ta konkretisá ku publikashon di Flor di Huku. Un tomo di poesia ku ta selebrá diferente aspekto di nos bida den un naturalesa ku rikesa deskribí den e idioma riku ku nos papiamentu ta. Ta di rekomendá pa kada amante di naturalesa i nos dushi papiamentu tin e tomo akí komo un presiosidat den nan propiedat literario. (Hubert Vis)
