Sùr Crispina

Dia 12 di ougùstùs 2023 Sùr Crispina (Monica Koeks) ta selebrá eksaktamente 67 aña ku ela drenta kombentu serka Sùrnan di Roosendaal. E ta kumpli na mes momentu 65 aña ku ela hasi su voto perpetuo.

Ta trata aki di un persona, un religioso, ku kalidatnan ekstraordinario ku nos lo keda rekordá pa di tal manera e sirbi generashonnan di futuro komo un gran ehèmpel kon nos por uza nos deboshon, talentonan i amor pa Reino di Dios i pa nos próhimo en partikular. Na unda ku nos ta i ken ku nos ta!  

Sùr Crispina ta un di e grandinan den historia di su isla Bonaire. Ela nase den un famia ku un tradishon largu di entregá su yunan na Iglesia komo religioso. Un tradishon ku e mes tambe a kontinuá ora ela drenta kombentu na 1956 i a skohe pa alabes studia pa bira un enfermera ku ta kuida su próhimo ku ta sufri di un kebrante di salú.

Komo religioso Sùr Crispina a sirbi su Dios i su próhimo spiritualmente ku tur su entrega. Komo enfermera ela yuda miles di esunnan ku tabata sufri di kualke malesa rekobrá nan salú i bida atrobe. Esaki ela hasi trahando na Hulanda, Kòrsou, Bonaire i Sürnam. Pa kada un di e fasenan den kuido ela ser debidamente entrená i sostené pa su diferente superiornan. Tur esakinan ku hopi eksito.

Komo un di e rekonosementunan profeshonal mas grandi den su karera i tambe historia di Bonaire, Sùr Crispina a ser apuntá komo direktor di e úniko hospital grandi di Bonaire: Hospital San Francisco. Ela bria den su trabounan komo religioso, enfermera, kolega i direktor.  

Ta ku gran orguyo pueblonan di Bonaire, Kòrsou i Sürnam ta yama Sùr Crispina danki pa e gran hende ku e  ta. Pa e kuido, konseho i ehèmpel ku semper ela duna ku tantu amor,  kompaña ku un orashon.

E publikashon aki ta duna e lesadó un bista rapido di algun e diferente aspektonan di bida di e religioso i enfermera boneriano ku a biba su bida ku un dedikashon total na Dios i su próhimo.  Kasa Real, Gobiernu di Boneiru i su pueblo di Rincon tur a dun’é nan kondekorashon ku palabranan di gran apresio.